ຂປລ. ກະຊວງການເງິນ ຈັດກອງປະຊຸມປຶກສາຫາລື ແລະ ປະເມີນຜົນຄືນໂຄງການພັດທະນາລະບົບຂໍ້ມູນ ຂ່າວສານຄຸ້ມຄອງຊັບສິນແຫ່ງລັດ ແບບເອເລັກໂຕຣນິກ (AMIS) ໃນວັນທີ 17 ພະຈິກ 2022 ໂດຍການເປັນປະ ທານຂອງ ທ່ານ ສົມບູນ ອິນທະປັດຖາ ຫົວໜ້າຫ້ອງການກະຊວງການເງິນ, ມີຮັກສາການຫົວໜ້າກົມເຕັກໂນໂລຊີ ຂໍ້ມູນຂ່າວສານການເງິນ, ຮອງຫົວໜ້າກົມສ່ວຍສາອາກອນ, ຮອງຫົວໜ້າກົມກວດກາ ກະຊວງການເງິນ, ຮອງຫົວ ໜ້າກົມຄຸ້ມຄອງຊັບສິນແຫ່ງລັດ, ຜູ້ຕາງໜ້າຄັງເງິນແຫ່ງຊາດ, ພ້ອມດ້ວຍບັນດາຫົວໜ້າພະແນກ, ຮອງຫົວໜ້າພະແນກ, ວິຊາການຂອງບັນດາກົມທີ່ກ່ຽວຂ້ອງ ແລະ ບໍລິສັດຜູ້ພັດທະນາລະບົບ ເຂົ້າຮ່ວມ.

ກອງປະຊຸມໄດ້ຮັບຟັງການລາຍງານໂດຍສັງເຂບກ່ຽວກັບ ການພັດທະນາລະບົບຂໍ້ມູນຂ່າວສານຄຸ້ມຄອງຊັບສິນແຫ່ງລັດ ແບບເອເລັກໂຕຣນິກ (AMIS) ໂດຍກົມຄຸ້ມຄອງຊັບສິນແຫ່ງລັດ ແລະ ການນໍາສະເໜີລະບົບ AMIS ຂອງບໍລິສັດຜູ້ພັດທະນາລະບົບ, ໃນກອງປະຊຸມໄດ້ຕົກລົງເຫັນດີເປັນເອກະພາບຢັ້ງຢືນ ແລະ ຮັບຮອງ ລະບົບດັ່ງ ກ່າວ ພັດທະນາສໍາເລັດຮ້ອຍສ່ວນຮ້ອຍ ແລະ ຖືກຕ້ອງຄົບຖ້ວນຕາມມາດຕະຖານເອກະສານການອອກແບບ, ສັນ ຍາ ແລະ ຂອບເຂດຂອງ (TOR) ທີ່ໄດ້ວາງອອກ.

ລະບົບ AMIS ປະກອບມີຂໍ້ມູນຊັບສິນແຫ່ງລັດ ປະເພດລັດຖະສົມບັດ ເປັນຕົ້ນ ຟອມບັນທຶກຂໍ້ມູນການຂຶ້ນບັນຊີ-ຂຶ້ນທະບຽນພາຫະນະ, ເຄື່ອງໃຊ້ໄຟຟ້າ, ເຟີນີເຈີ ແລະ ອຸປະກອນຕ່າງໆ. ຂໍ້ມູນຖານລາຍຮັບ ເປັນຕົ້ນ ຟອມບັນທຶກຄ່າເຊົ່າ, ຄ່າສໍາປະທານ, ສັນຍາຊື້-ຂາຍ, ຄ່າຊັບພະຍາກອນ (ໂຄງການເຂື່ອນໄຟຟ້າ ແລະ ແຮ່ທາດ). ຊຶ່ງບັນດາກົມສາມາດເຂົ້າເບິ່ງຂໍ້ມູນ ແລະ ຕິດຕາມຊັບສິນຂອງກົມກອງຕົນເອງໄດ້ໂດຍຜ່ານລະຫັດຜູ້ນໍາໃຊ້ (User) ຂອງກົມຕົນ. ສ່ວນການປ້ອນຂໍ້ມູນຊັບສິນປະເພດຕ່າງໆ ແລະ ສັນຍາອື່ນໆ ຕ້ອງແມ່ນເຈົ້າຂອງໂຄງການ (ກະຊວງ ການເງິນ) ຜູ້ນຳໃຊ້ລະບົບເປັນຜູ້ປ້ອນ ແລະ ບັນທຶກຂໍ້ມູນເຂົ້າໃນລະບົບດັ່ງກ່າວ.

ສຳລັບການພັດທະນາການເຊື່ອມຕໍ່ລະບົບ AMIS ກັບ ລະບົບ TaxRIS ແມ່ນບໍ່ມີໃນສັນຍາ ແລະ TOR ກຳນົດໄວ້ເປັນການພັດທະນາເພີ່ມເຕີມ, ທາງບໍລິສັດຜູ້ພັດທະນາລະບົບ AMIS ແມ່ນເຫັນດີຈະພັດທະນາລະບົບການເຊື່ອມຕໍ່ໃຫ້ສາມາດເຊື່ອມໂຍງກັນໄດ້ ໂດຍບໍ່ໄດ້ຄິດໄລ່ມູນຄ່າແຕ່ຢ່າງໃດ ໂດຍມອບໃຫ້ກົມຄຸ້ມຄອງຊັບສິນແຫ່ງລັດ, ກົມສ່ວຍສາອາກອນ ແລະ ບໍລິສັດຜູ້ພັດທະນາລະບົບ AMIS ເຮັດວຽກຮ່ວມກັນໃຫ້ສຳເລັດພາຍໃນເດືອນພະຈິກ ປີ 2022, ແລ້ວຈັດກອງປະຊຸມນຳສະເໜີໃຫ້ເຫັນເປັນຮູບປະທຳຕົວຈິງ ເພື່ອຈະໄດ້ລາຍງານຄະນະນຳກະຊວງການເງິນ ແລະ ຄະນະຫັນເປັນດິຈິຕອນ ຂອງກະຊວງການເງິນຮັບຊາບ.

ສໍາລັບທິດທາງແຜນການ-ການນຳໃຊ້ ແລະ ພັດທະນາລະບົບ AMIS ໃຫ້ຄົບຖ້ວນສົມບູນຈະໄດ້ມີການພັດທະນາ Application (AMIS App), ສືບຕໍ່ສ້າງ Application ຂອງລະບົບ AMIS ເທິງໂທລະສັບມືຖືຮອງຮັບລະບົບ Android ແລະ iOS ເພື່ອໃຫ້ລະບົບສາມາດກວດສອບຂໍ້ມູນຂອງແຕ່ລະພາກສ່ວນທີ່ນຳໃຊ້ຍານພາຫະນະ, ວັດຖຸປະກອນດ້ວຍການສະແກນຜ່ານ QR code ແລະ ລາຍງານຕ່າງໆໄດ້ສະດວກ, ຜັນຂະຫຍາຍການ ນຳໃຊ້ລະບົບ AMIS ໃຫ້ໄດ້ທົ່ວເຖິງທຸກໆກະຊວງ ແລະ ອົງການທຽບເທົ່າ, ບັນດາແຂວງໃນຂອບເຂດທົ່ວປະເທດ;ຝຶກອົບຮົມແບບອອນລາຍ ຫລື ໃນຮູບແບບຝຶກອົບຮົມແບບສຳມະນາ, ຝຶກອົບຮົມປະຈຳປີ, ຜັນຂະຫຍາຍສືບ ຕໍ່ພັດທະນາລະບົບ AMIS ໃຫ້ເປັນມະຫາພາກຍິ່ງຂຶ້ນ ໂດຍການນຳໃຊ້ເຕັກໂນໂລຊີທີ່ທັນສະໄໝເຂົ້າຊ່ວຍ; ສືບຕໍ່ ການເຊື່ອມຕໍ່ລະຫວ່າງລະບົບ AMIS ແລະ ລະບົບຖານຂໍ້ມູນການຂຶ້ນບັນຊີໂຄງການເຊົ່າ ແລະ ສຳປະທານທີ່ດິນ ຂອງລັດຢູ່ ສປປ ລາວ(LCIS); ສືບຕໍ່ການເຊື່ອມຕໍ່ລະຫວ່າງລະບົບ AMIS ແລະ ລະບົບຖານຂໍ້ມູນການຂຶ້ນບັນຊີ-ການຂຶ້ນທະບຽນພາຫະນະຂອງລັດຢູ່ກົມຂົນສົ່ງ ກະຊວງໂຍທາທິການ ແລະ ຂົນສົ່ງ, ທັງດຳເນີນການປັບປຸງໂຄງສ້າງ ຖານຂໍ້ມູນຂອງລະບົບ AMIS ເພື່ອໃຫ້ຮອງຮັບກັບຂໍ້ມູນການຈັດເກັບລາຍຮັບຕົວຈິງທີ່ບັນດາບໍລິສັດໄດ້ມອບລາຍຮັບທີ່ເກັບຈາກຊັບສິນຂອງລັດເຂົ້າໃນລະບົບ TaxRIS.